ਸਲਾਮੀ ਬੱਲੇਬਾਜ਼ ਈਸ਼ਾਨ ਕਿਸ਼ਨ ਅਤੇ ਹਾਰਦਿਕ ਪੰਡਯਾ ਦੇ ਤੂਫਾਨੀ ਅਰਧ ਸੈਂਕੜਿਆਂ ਦੀ ਮਦਦ ਨਾਲ ਭਾਰਤ ਨੇ ਵੀਰਵਾਰ ਨੂੰ ਇੱਥੇ ਆਈਸੀਸੀ ਟੀ-20 ਵਿਸ਼ਵ ਕੱਪ ਦੇ ਗਰੁੱਪ-ਏ ਮੈਚ ਵਿੱਚ ਨਾਮੀਬੀਆ ਖ਼ਿਲਾਫ਼ ਨੌਂ ਵਿਕਟਾਂ ’ਤੇ 209 ਦੌੜਾਂ ਬਣਾਈਆਂ। ਈਸ਼ਾਨ ਨੇ 24 ਗੇਂਦਾਂ ‘ਚ ਪੰਜ ਛੱਕਿਆਂ ਅਤੇ ਛੇ ਚੌਕਿਆਂ ਦੀ ਮਦਦ ਨਾਲ 61 ਦੌੜਾਂ ਬਣਾਈਆਂ, ਜਦਕਿ ਪੰਡਯਾ ਨੇ 28 ਗੇਂਦਾਂ ‘ਚ ਚਾਰ ਛੱਕਿਆਂ ਅਤੇ ਇੰਨੇ ਹੀ ਚੌਕਿਆਂ ਦੀ ਮਦਦ ਨਾਲ 52 ਦੌੜਾਂ ਬਣਾਈਆਂ। ਇਸ਼ਾਨ ਨੇ ਤਿਲਕ ਵਰਮਾ (25) ਨਾਲ ਦੂਜੀ ਵਿਕਟ ਲਈ 31 ਗੇਂਦਾਂ ‘ਚ 79 ਦੌੜਾਂ ਜੋੜ ਕੇ ਭਾਰਤ ਨੂੰ ਤੇਜ਼ ਸ਼ੁਰੂਆਤ ਦਿਵਾਈ, ਜਦਕਿ ਪੰਡਯਾ ਨੇ ਸ਼ਿਵਮ ਦੂਬੇ (23) ਨਾਲ 39 ਗੇਂਦਾਂ ‘ਚ 81 ਦੌੜਾਂ ਜੋੜ ਕੇ ਆਖਰੀ ਓਵਰਾਂ ‘ਚ ਰਨ ਰੇਟ ‘ਚ ਵਾਧਾ ਕੀਤਾ।

ਕਪਤਾਨ ਗੇਰਹਾਰਡ ਇਰਾਸਮਸ (ਚਾਰ ਓਵਰਾਂ ਵਿੱਚ 20 ਦੌੜਾਂ ਦੇ ਕੇ ਚਾਰ ਵਿਕਟਾਂ) ਅਤੇ ਬਰਨਾਰਡ ਸ਼ੋਲਟਜ਼ (ਚਾਰ ਓਵਰਾਂ ਵਿੱਚ 41 ਦੌੜਾਂ ਦੇ ਕੇ ਇੱਕ ਵਿਕਟ) ਦੀ ਸਪਿਨ ਜੋੜੀ ਨੇ ਮੱਧ ਓਵਰਾਂ ਵਿੱਚ ਸੰਜੀਦਾ ਗੇਂਦਬਾਜ਼ੀ ਕਰਕੇ ਰਨ ਰੇਟ ਨੂੰ ਕਾਬੂ ਵਿੱਚ ਰੱਖਿਆ। ਭਾਰਤ ਨੇ ਸੱਤ ਓਵਰਾਂ ਵਿੱਚ ਇੱਕ ਵਿਕਟ ’ਤੇ 104 ਦੌੜਾਂ ਬਣਾਈਆਂ ਸਨ ਪਰ ਟੀਮ ਆਖਰੀ 13 ਓਵਰਾਂ ਵਿੱਚ ਸਿਰਫ਼ 105 ਦੌੜਾਂ ਹੀ ਜੋੜ ਸਕੀ। ਇਰਾਸਮਸ ਨੇ ਟਾਸ ਜਿੱਤ ਕੇ ਭਾਰਤ ਨੂੰ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਸੱਦਾ ਦਿੱਤਾ, ਜਿਸ ਤੋਂ ਬਾਅਦ ਸੰਜੂ ਸੈਮਸਨ (22) ਨੇ ਰੂਬੇਨ ਟਰੰਪਮੈਨ (ਬਿਨਾਂ ਵਿਕਟ 38 ਦੌੜਾਂ) ‘ਤੇ ਛੱਕਾ ਲਗਾ ਕੇ ਖਾਤਾ ਖੋਲ੍ਹਿਆ ਅਤੇ ਫਿਰ ਬੇਨ ਸ਼ਿਕਾਂਗੋ (41 ਦੌੜਾਂ ‘ਤੇ 1 ਵਿਕਟ) ਦੀਆਂ ਲਗਾਤਾਰ ਗੇਂਦਾਂ ‘ਤੇ ਦੋ ਛੱਕੇ ਅਤੇ ਇਕ ਚੌਕਾ ਲਗਾਇਆ। ਹਾਲਾਂਕਿ, ਉਸਨੇ ਸ਼ਿਕਾਂਗੋ ਦੀ ਅਗਲੀ ਗੇਂਦ ਨੂੰ ਸਿੱਧਾ ਲੌਰੇਨ ਸਟੀਨਕੈਂਪ ਦੇ ਹੱਥਾਂ ਵਿੱਚ ਡੀਪ ਮਿਡਵਿਕਟ ‘ਤੇ ਖੇਡਿਆ।

ਈਸ਼ਾਨ ਨੇ ਜੇਜੇ ਸਮਿਤ (50 ਦੌੜਾਂ ‘ਤੇ 1 ਵਿਕਟ) ਦਾ ਲਗਾਤਾਰ ਦੋ ਚੌਕੇ ਲਗਾ ਕੇ ਸਵਾਗਤ ਕੀਤਾ ਜਦਕਿ ਸ਼ਿਕਾਂਗੋ ਦੀ ਗੇਂਦ ਵੀ ਚੌਕੇ ‘ਤੇ ਲੱਗੀ। ਤਿਲਕ ਵਰਮਾ ਨੇ ਵੀ ਟਰੰਪਮੈਨ ‘ਤੇ ਦੋ ਚੌਕੇ ਲਗਾਏ। ਇਸ਼ਾਨ ਨੇ ਛੇਵੇਂ ਓਵਰ ਵਿੱਚ ਸਮਿਤ ਤੋਂ ਲਗਾਤਾਰ ਗੇਂਦਾਂ ’ਤੇ ਚਾਰ ਛੱਕੇ ਅਤੇ ਇੱਕ ਚੌਕੇ ਦੀ ਮਦਦ ਨਾਲ 20 ਗੇਂਦਾਂ ਵਿੱਚ ਆਪਣਾ ਅਰਧ ਸੈਂਕੜਾ ਪੂਰਾ ਕੀਤਾ। ਪਾਵਰ ਪਲੇਅ ‘ਚ ਭਾਰਤ ਨੇ ਇਕ ਵਿਕਟ ‘ਤੇ 86 ਦੌੜਾਂ ਬਣਾਈਆਂ। ਹਾਲਾਂਕਿ, ਤਿਲਕ 19 ਦੌੜਾਂ ਦੇ ਸਕੋਰ ‘ਤੇ ਖੁਸ਼ਕਿਸਮਤ ਰਿਹਾ ਜਦੋਂ ਸਟੀਨਕੈਂਪ ਨੇ ਮੈਕਸ ਹੀਂਗੋ ਦੀ ਗੇਂਦ ‘ਤੇ ਬੈਕਵਰਡ ਪੁਆਇੰਟ ‘ਤੇ ਆਪਣਾ ਕੈਚ ਛੱਡ ਦਿੱਤਾ। ਈਸ਼ਾਨ ਨੇ ਹੀਂਗੋ ਤੋਂ ਲਗਾਤਾਰ ਗੇਂਦਾਂ ‘ਤੇ ਛੱਕੇ ਅਤੇ ਚੌਕੇ ਲਗਾ ਕੇ 6.5 ਓਵਰਾਂ ‘ਚ ਭਾਰਤ ਦਾ ਸੈਂਕੜਾ ਪੂਰਾ ਕੀਤਾ, ਜੋ ਪੁਰਸ਼ਾਂ ਦੇ ਟੀ-20 ਵਿਸ਼ਵ ਕੱਪ ‘ਚ ਕਿਸੇ ਵੀ ਟੀਮ ਦਾ ਸਭ ਤੋਂ ਤੇਜ਼ ਸੈਂਕੜਾ ਹੈ। ਆਫ ਸਪਿਨਰ ਇਰਾਸਮਸ ਨੇ ਪਹਿਲੀ ਹੀ ਗੇਂਦ ‘ਤੇ ਈਸ਼ਾਨ ਨੂੰ ਡੀਪ ਮਿਡਵਿਕਟ ‘ਤੇ ਸ਼ਿਕਾਂਗੋ ਹੱਥੋਂ ਕੈਚ ਕਰਵਾ ਕੇ ਨਾਮੀਬੀਆ ਨੂੰ ਵੱਡੀ ਸਫਲਤਾ ਦਿਵਾਈ। ਈਸ਼ਾਨ ਨੇ 24 ਗੇਂਦਾਂ ਦਾ ਸਾਹਮਣਾ ਕਰਦਿਆਂ ਛੇ ਚੌਕੇ ਤੇ ਪੰਜ ਛੱਕੇ ਲਾਏ।

ਕਪਤਾਨ ਸੂਰਿਆਕੁਮਾਰ ਯਾਦਵ ਵੀ 13 ਗੇਂਦਾਂ ‘ਚ 12 ਦੌੜਾਂ ਬਣਾ ਕੇ ਖੱਬੇ ਹੱਥ ਦੇ ਸਪਿਨਰ ਬਰਨਾਰਡ ਸ਼ੋਲਟਜ਼ ਦੀ ਗੇਂਦ ‘ਤੇ ਵਿਕਟਕੀਪਰ ਜ਼ੈਨ ਗ੍ਰੀਨ ਹੱਥੋਂ ਸਟੰਪ ਆਊਟ ਹੋ ਗਏ। ਇਸ ਤੋਂ ਬਾਅਦ ਇਰਾਸਮਸ ਦੀ ਗੇਂਦ ‘ਤੇ ਵੱਡਾ ਸ਼ਾਟ ਖੇਡਣ ਦੀ ਕੋਸ਼ਿਸ਼ ‘ਚ ਤਿਲਕ ਵੀ ਸਮਿਤ ਨੂੰ ਲਾਂਗ ਆਫ ‘ਤੇ ਕੈਚ ਦੇ ਬੈਠਾ, ਜਿਸ ਕਾਰਨ ਭਾਰਤ ਦਾ ਸਕੋਰ 12ਵੇਂ ਓਵਰ ‘ਚ ਚਾਰ ਵਿਕਟਾਂ ‘ਤੇ 124 ਦੌੜਾਂ ਹੋ ਗਿਆ। ਦੁਬੇ ਅਤੇ ਪੰਡਯਾ ਨੇ 15ਵੇਂ ਓਵਰ ‘ਚ ਸ਼ੋਲਟਜ਼ ‘ਤੇ ਇਕ-ਇਕ ਛੱਕਾ ਜੜ ਕੇ ਟੀਮ ਦਾ ਸਕੋਰ 150 ਦੌੜਾਂ ਤੋਂ ਪਾਰ ਪਹੁੰਚਾਇਆ।

ਹਾਰਦਿਕ ਨੇ ਸ਼ਿਕਾਂਗੋ ਦੀਆਂ ਲਗਾਤਾਰ ਗੇਂਦਾਂ ‘ਤੇ ਛੱਕਾ ਅਤੇ ਦੋ ਚੌਕੇ ਲਗਾਏ। ਉਸ ਨੇ ਆਪਣਾ ਅਰਧ ਸੈਂਕੜਾ 27 ਗੇਂਦਾਂ ‘ਚ ਪੂਰਾ ਕੀਤਾ ਅਤੇ 19ਵੇਂ ਓਵਰ ‘ਚ ਇਰੇਸਮਸ ‘ਤੇ ਛੱਕਾ ਲਗਾ ਕੇ ਟੀਮ ਦੀਆਂ 200 ਦੌੜਾਂ ਪੂਰੀਆਂ ਕੀਤੀਆਂ। ਹਾਲਾਂਕਿ ਉਹ ਅਗਲੀ ਗੇਂਦ ‘ਤੇ ਡੀਪ ਬੈਕਵਰਡ ਸਕਵੇਅਰ ਲੈੱਗ ‘ਤੇ ਕੈਚ ਹੋ ਕੇ ਪੈਵੇਲੀਅਨ ਪਰਤ ਗਏ। ਦੂਬੇ ਅਗਲੀ ਗੇਂਦ ‘ਤੇ ਰਨ ਆਊਟ ਹੋ ਗਏ ਜਦਕਿ ਇਰੇਸਮਸ ਨੇ ਅਕਸ਼ਰ ਪਟੇਲ (0) ਨੂੰ ਵੀ ਉਸੇ ਓਵਰ ‘ਚ ਬੋਲਡ ਕਰ ਦਿੱਤਾ। ਰਿੰਕੂ ਸਿੰਘ ਵੀ ਇੱਕ ਦੌੜ ਬਣਾ ਕੇ ਸਮਿਤ ਦਾ ਸ਼ਿਕਾਰ ਬਣ ਗਿਆ ਜਦਕਿ ਅਰਸ਼ਦੀਪ ਸਿੰਘ (02) ਆਖਰੀ ਗੇਂਦ ‘ਤੇ ਰਨ ਆਊਟ ਹੋ ਗਿਆ।