ਅਜੇਤੂ ਭਾਰਤੀ ਟੀਮ ਬੁੱਧਵਾਰ ਨੂੰ ਹਰਾਰੇ ਵਿੱਚ ਆਈਸੀਸੀ ਅੰਡਰ-19 ਵਿਸ਼ਵ ਕੱਪ 2026 ਦੇ ਦੂਜੇ ਸੈਮੀਫਾਈਨਲ ਵਿੱਚ ਸਪਸ਼ਟ ਦਾਅਵੇਦਾਰ ਵਜੋਂ ਅਫਗਾਨਿਸਤਾਨ ਦਾ ਸਾਹਮਣਾ ਕਰੇਗੀ। ਆਯੁਸ਼ ਮਹਾਤਰੇ ਦੀ ਕਪਤਾਨੀ ਵਿੱਚ ਭਾਰਤ ਨੇ ਹੁਣ ਤੱਕ ਆਪਣੇ ਸਾਰੇ ਪੰਜ ਮੈਚ ਜਿੱਤੇ ਹਨ। ਉਨ੍ਹਾਂ ਦੀ ਸਭ ਤੋਂ ਤਾਜ਼ਾ ਜਿੱਤ ਸੁਪਰ ਸਿਕਸ ਦੇ ਨਿਰਣਾਇਕ ਮੈਚ ਵਿੱਚ ਪਾਕਿਸਤਾਨ ਦੇ ਖਿਲਾਫ ਹੋਈ ਸੀ। ਦੂਜੇ ਪਾਸੇ ਅਫਗਾਨਿਸਤਾਨ ਨੇ ਵੀ ਟੂਰਨਾਮੈਂਟ ਵਿੱਚ ਸ਼ਲਾਘਾਯੋਗ ਪ੍ਰਦਰਸ਼ਨ ਕੀਤਾ ਹੈ। ਉਨ੍ਹਾਂ ਨੇ ਆਪਣੇ ਪੰਜ ਮੈਚਾਂ ‘ਚੋਂ ਚਾਰ ‘ਚ ਜਿੱਤ ਦਰਜ ਕੀਤੀ ਹੈ, ਜਦਕਿ ਟੂਰਨਾਮੈਂਟ ‘ਚ ਉਨ੍ਹਾਂ ਦੀ ਇਕਲੌਤੀ ਹਾਰ ਪਹਿਲਾਂ ਹੀ ਸ਼੍ਰੀਲੰਕਾ ਖਿਲਾਫ ਹੋਈ ਹੈ।

 

ਕੁੱਲ ਮਿਲਾ ਕੇ, ਅਤੇ ਟੀਮ ਦੀ ਰਚਨਾ ਅਤੇ ਇਕਸਾਰਤਾ ਦੇ ਆਧਾਰ ‘ਤੇ, ਸੈਮੀਫਾਈਨਲ ‘ਚ ਭਾਰਤ ਦੀ ਜਿੱਤ ਦੀ ਉਮੀਦ ਹੈ। ਜੇਤੂ ਟੀਮ ਦਾ ਸਾਹਮਣਾ ਆਸਟ੍ਰੇਲੀਆ ਅਤੇ ਇੰਗਲੈਂਡ ਵਿਚਾਲੇ ਹੋਣ ਵਾਲੇ ਪਹਿਲੇ ਸੈਮੀਫਾਈਨਲ ਦੇ ਜੇਤੂ ਨਾਲ ਹੋਵੇਗਾ। ਵਿਕਟਕੀਪਰ ਬੱਲੇਬਾਜ਼ ਅਭਿਗਿਆਨ ਕੁੰਡੂ ਨੇ ਬੱਲੇਬਾਜ਼ੀ ‘ਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਖੱਬੇ ਹੱਥ ਦੇ ਇਸ ਬੱਲੇਬਾਜ਼ ਨੇ ਹੁਣ ਤੱਕ ਪੰਜ ਮੈਚਾਂ ਵਿੱਚ ਦੋ ਅਰਧ ਸੈਂਕੜਿਆਂ ਦੀ ਮਦਦ ਨਾਲ 199 ਦੌੜਾਂ ਬਣਾਈਆਂ ਹਨ। ਵੱਡੇ ਸ਼ਾਟ ਖੇਡਣ ਦਾ ਮਾਹਰ ਸਲਾਮੀ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ (ਪੰਜ ਮੈਚਾਂ ‘ਚ ਦੋ ਅਰਧ ਸੈਂਕੜਿਆਂ ਸਮੇਤ 196 ਦੌੜਾਂ) ਵੀ ਚੰਗੀ ਫਾਰਮ ‘ਚ ਹੈ ਪਰ ਟੀਮ ਪ੍ਰਬੰਧਨ ਚਾਹੇਗਾ ਕਿ ਉਹ ਆਪਣੇ ਅਰਧ ਸੈਂਕੜਿਆਂ ਨੂੰ ਸੈਂਕੜਿਆਂ ‘ਚ ਬਦਲ ਦੇਵੇ। ਹਰਫਨਮੌਲਾ ਵਿਹਾਨ ਮਲਹੋਤਰਾ (ਪੰਜ ਮੈਚਾਂ ਵਿੱਚ 172 ਦੌੜਾਂ) ਨਜ਼ਰ ਰੱਖਣ ਵਾਲਾ ਇੱਕ ਹੋਰ ਭਾਰਤੀ ਬੱਲੇਬਾਜ਼ ਹੈ। ਉਸ ਨੇ ਗਰੁੱਪ ਗੇੜ ਵਿੱਚ ਜ਼ਿੰਬਾਬਵੇ ਖ਼ਿਲਾਫ਼ ਸੈਂਕੜਾ (ਅਜੇਤੂ 109) ਬਣਾਇਆ ਸੀ।

ਕਪਤਾਨ ਆਯੂਸ਼ ਮਹਾਤਰੇ ਨੇ ਗੇਂਦਬਾਜ਼ੀ ‘ਚ ਲਗਾਤਾਰ ਚੰਗਾ ਪ੍ਰਦਰਸ਼ਨ ਕੀਤਾ ਹੈ। ਉਸ ਨੇ ਪੰਜ ਮੈਚਾਂ ਵਿੱਚ ਆਪਣੀ ਆਫ-ਬ੍ਰੇਕ ਗੇਂਦਬਾਜ਼ੀ ਨਾਲ ਛੇ ਵਿਕਟਾਂ ਲਈਆਂ ਹਨ, ਪਰ ਉਸ ਦੀ ਬੱਲੇਬਾਜ਼ੀ ਵਿੱਚ ਸੁਧਾਰ ਦੀ ਗੁੰਜਾਇਸ਼ ਹੈ। ਉਸ ਨੇ ਪੰਜ ਮੈਚਾਂ ਵਿੱਚ ਸਿਰਫ਼ 99 ਦੌੜਾਂ ਬਣਾਈਆਂ ਹਨ ਜਿਸ ਵਿੱਚ ਉਸ ਦਾ ਸਭ ਤੋਂ ਵੱਧ ਸਕੋਰ 53 ਦੌੜਾਂ ਹੈ। ਸਲਾਮੀ ਬੱਲੇਬਾਜ਼ ਆਰੋਨ ਜਾਰਜ ਦੀ ਫਾਰਮ ਵੀ ਭਾਰਤ ਲਈ ਚਿੰਤਾ ਦਾ ਵਿਸ਼ਾ ਹੈ ਕਿਉਂਕਿ ਸੱਜੇ ਹੱਥ ਦਾ ਇਹ ਬੱਲੇਬਾਜ਼ ਤਿੰਨ ਪਾਰੀਆਂ ਵਿੱਚ ਸਿਰਫ਼ 46 ਦੌੜਾਂ ਹੀ ਬਣਾ ਸਕਿਆ ਹੈ।

 

ਭਾਰਤੀ ਗੇਂਦਬਾਜ਼ੀ ਦੀ ਕਮਾਨ ਸੱਜੇ ਹੱਥ ਦੇ ਤੇਜ਼ ਗੇਂਦਬਾਜ਼ ਹੇਨਿਲ ਪਟੇਲ ਅਤੇ ਆਰ.ਐੱਸ. ਅੰਬਰੀਸ਼ ਕੋਲ ਹੈ। ਇਨ੍ਹਾਂ ਦੋਵਾਂ ਤੇਜ਼ ਗੇਂਦਬਾਜ਼ਾਂ ਨੂੰ ਸਪਿਨਰ ਖਿਲਾਨ ਪਟੇਲ ਦਾ ਵੀ ਚੰਗਾ ਸਮਰਥਨ ਮਿਲਿਆ ਹੈ, ਜਿਸ ਨੇ ਪੰਜ ਮੈਚਾਂ ਵਿੱਚ ਅੱਠ ਵਿਕਟਾਂ ਲਈਆਂ ਹਨ। ਮਹਾਤਰੇ ਅਤੇ ਮਲਹੋਤਰਾ ਗੇਂਦਬਾਜ਼ੀ ਵਿੱਚ ਵੀ ਆਪਣੀ ਭੂਮਿਕਾ ਨਿਭਾਉਣਗੇ। ਆਪਣੀ ਆਫ ਬ੍ਰੇਕ ਗੇਂਦਬਾਜ਼ੀ ਨਾਲ ਪੰਜ ਵਿਕਟਾਂ ਲੈਣ ਤੋਂ ਇਲਾਵਾ ਮਲਹੋਤਰਾ ਨੇ ਟੂਰਨਾਮੈਂਟ ‘ਚ ਭਾਰਤ ਲਈ ਹੁਣ ਤੱਕ ਦਾ ਇਕਲੌਤਾ ਸੈਂਕੜਾ ਵੀ ਲਗਾਇਆ ਹੈ।