ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ (ਪੀਸੀਏ) ਜੂਨ 2026 ਵਿੱਚ ਪੰਜਾਬ ਪ੍ਰੀਮੀਅਰ ਲੀਗ (ਪੀਪੀਐਲ) ਦਾ ਆਯੋਜਨ ਕਰਨ ਜਾ ਰਹੀ ਹੈ। ਪੰਜਾਬ ਦੀ ਘਰੇਲੂ ਟੀ-20 ਕ੍ਰਿਕਟ ਲੀਗ ਹੁਣ ਇੱਕ ਨਵੇਂ ਨਾਮ ਅਤੇ ਨਵੇਂ ਫਾਰਮੈਟ ਵਿੱਚ ਖੇਡੀ ਜਾਵੇਗੀ। ਪੀਪੀਐਲ ਦੀਆਂ ਸਾਰੀਆਂ 6 ਟੀਮਾਂ ਫਰੈਂਚਾਇਜ਼ੀ ਆਧਾਰਿਤ ਹੋਣਗੀਆਂ ਅਤੇ ਖਿਡਾਰੀਆਂ ਦੀ ਚੋਣ ਨਿਲਾਮੀ ਰਾਹੀਂ ਕੀਤੀ ਜਾਵੇਗੀ। ਪੀਸੀਏ ਵੱਲੋਂ ਜਾਰੀ ਪ੍ਰੈਸ ਬਿਆਨ ਅਨੁਸਾਰ ਪੰਜਾਬ ਵਿੱਚ ਰਜਿਸਟਰਡ ਖਿਡਾਰੀ ਹੀ ਭਾਗ ਲੈਣਗੇ।

ਇਹ ਵੀ ਪੜ੍ਹੋ: ਆਸਟ੍ਰੇਲੀਆਈ ਕ੍ਰਿਕਟ ‘ਚ ਹੰਗਾਮਾ, ਮਾਰਕ ਵਾ ਨੇ ਕਿਹਾ- ਸਟੀਵ ਸਮਿਥ ਨੂੰ ਬਾਹਰ ਕਰਨਾ ਸੀ ਸਭ ਤੋਂ ਵੱਡੀ ਗਲਤੀ

ਪੰਜਾਬ ਪ੍ਰੀਮੀਅਰ ਲੀਗ ਵਿੱਚ ਪੰਜਾਬ ਦੇ ਸਾਰੇ ਨਾਮਵਰ ਖਿਡਾਰੀ ਸ਼ਾਮਲ ਹੋਣਗੇ। ਭਾਰਤੀ ਟੈਸਟ ਅਤੇ ਸੀਮਤ ਓਵਰਾਂ ਦੇ ਸਲਾਮੀ ਬੱਲੇਬਾਜ਼ ਸ਼ੁਭਮਨ ਗਿੱਲ, ਭਾਰਤ ਦੇ ਨੰਬਰ 1 ਟੀ-20 ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਅਤੇ ਗੇਂਦਬਾਜ਼ ਅਰਸ਼ਦੀਪ ਸਿੰਘ ਪ੍ਰਮੁੱਖ ਖਿਡਾਰੀਆਂ ਵਜੋਂ ਸ਼ਾਮਲ ਹੋਣਗੇ। ਇਨ੍ਹਾਂ ਤੋਂ ਇਲਾਵਾ ਪੰਜਾਬ ਦੇ ਹੋਰ ਤਜ਼ਰਬੇਕਾਰ ਖਿਡਾਰੀ ਰਮਨਦੀਪ ਸਿੰਘ, ਨੇਹਾਲ ਵਢੇਰਾ, ਨਮਨ ਧੀਰ, ਅਨਮੋਲਪ੍ਰੀਤ ਸਿੰਘ ਅਤੇ ਪ੍ਰਭਸਿਮਰਨ ਸਿੰਘ ਨੂੰ ਵੀ ਅਹਿਮ ਖਿਡਾਰੀਆਂ ਵਜੋਂ ਸ਼ਾਮਲ ਕੀਤਾ ਜਾ ਸਕਦਾ ਹੈ। ਮੌਜੂਦਾ ਭਾਰਤੀ ਅੰਡਰ-19 ਟੀਮ ਦੇ ਨੌਜਵਾਨ ਖਿਡਾਰੀ ਵਿਹਾਨ ਮਲਹੋਤਰਾ ਵੀ ਇਸ ਵਿੱਚ ਸ਼ਾਮਲ ਹੋਣਗੇ।

ਸੀਨੀਅਰ ਖਿਡਾਰੀਆਂ ਦੇ ਨਾਲ-ਨਾਲ ਪੰਜਾਬ ਦੇ ਅੰਡਰ-23 ਖਿਡਾਰੀਆਂ ਨੂੰ ਵੀ ਖੇਡਣ ਦਾ ਮੌਕਾ ਮਿਲੇਗਾ। ਇਨ੍ਹਾਂ ਦਿੱਗਜ ਖਿਡਾਰੀਆਂ ਤੋਂ ਇਲਾਵਾ ਪੰਜਾਬ ਪ੍ਰੀਮੀਅਰ ਲੀਗ ਵਿੱਚ ਪੰਜਾਬ ਦੇ ਕਈ ਹੋਰ ਉਭਰਦੇ ਕ੍ਰਿਕਟਰ ਵੀ ਸ਼ਾਮਲ ਹੋਣਗੇ ਜਿਨ੍ਹਾਂ ਨੇ ਘਰੇਲੂ ਅਤੇ ਆਈਪੀਐਲ ਪੱਧਰ ‘ਤੇ ਆਪਣੀ ਛਾਪ ਛੱਡੀ ਹੈ। ਟੂਰਨਾਮੈਂਟ ਵਿੱਚ ਮਯੰਕ ਮਾਰਕੰਡੇ, ਅਸ਼ਵਨੀ ਕੁਮਾਰ, ਗੁਰਨੂਰ ਬਰਾੜ, ਹਰਨੂਰ ਸਿੰਘ, ਰਮਨ ਧੀਰ ਅਤੇ ਹਰਪ੍ਰੀਤ ਬਰਾੜ ਵਰਗੇ ਖਿਡਾਰੀ ਭਾਗ ਲੈਣਗੇ, ਜਿਸ ਨਾਲ ਲੀਗ ਵਿੱਚ ਮਜ਼ਬੂਤੀ ਅਤੇ ਮੁਕਾਬਲਾ ਵਧੇਗਾ। ਇਸ ਤੋਂ ਇਲਾਵਾ ਸਲਿਲ ਅਰੋੜਾ, ਰਘੂ ਸ਼ਰਮਾ ਅਤੇ ਕਈ ਹੋਰ ਪ੍ਰਤਿਭਾਸ਼ਾਲੀ ਖਿਡਾਰੀ ਵੀ ਪੀ.ਪੀ.ਐੱਲ. ਦਾ ਹਿੱਸਾ ਹੋਣਗੇ।

ਇਹ ਵੀ ਪੜ੍ਹੋ: ਰਣਜੀ ਟਰਾਫੀ ਕ੍ਰਿਕਟ ਟੂਰਨਾਮੈਂਟ ਜੰਮੂ-ਕਸ਼ਮੀਰ ਨੇ ਬੰਗਾਲ ਨੂੰ ਹਰਾ ਕੇ ਪਹਿਲੀ ਵਾਰ ਰਣਜੀ ਟਰਾਫੀ ਦੇ ਫਾਈਨਲ ‘ਚ ਪ੍ਰਵੇਸ਼ ਕੀਤਾ

ਸਾਰੇ ਖਿਡਾਰੀਆਂ ਦੀ ਚੋਣ ਡਰਾਫਟ ਰਾਹੀਂ ਕੀਤੀ ਜਾਵੇਗੀ। ਕਈ ਖਿਡਾਰੀਆਂ ਨੂੰ ਵੱਖ-ਵੱਖ ਕੀਮਤ ਰੇਂਜਾਂ ਵਿੱਚ ਰੱਖਿਆ ਜਾਵੇਗਾ ਅਤੇ ਟੀਮਾਂ ਨੂੰ ਆਪਣੇ ਮਨਪਸੰਦ ਖਿਡਾਰੀਆਂ ਲਈ ਬੋਲੀ ਲਗਾਉਣ ਦਾ ਮੌਕਾ ਮਿਲੇਗਾ। ਪੰਜਾਬ ਪ੍ਰੀਮੀਅਰ ਲੀਗ 2026 ਵਿੱਚ ਛੇ ਫਰੈਂਚਾਈਜ਼ੀਆਂ ਹਿੱਸਾ ਲੈਣਗੀਆਂ, ਅਤੇ ਪੰਜਾਬ ਦੇ ਕਈ ਪ੍ਰਮੁੱਖ ਕਾਰੋਬਾਰੀ ਘਰਾਣੇ ਅਤੇ ਕਾਰਪੋਰੇਟ ਸਮੂਹ ਮਾਲਕੀ ਹਿੱਸੇਦਾਰੀ ਹਾਸਲ ਕਰਨ ਅਤੇ ਰਾਜ ਦੀ ਪ੍ਰਮੁੱਖ ਘਰੇਲੂ ਟੀ-20 ਲੀਗ ਵਿੱਚ ਸ਼ਾਮਲ ਹੋਣ ਲਈ ਉਤਸੁਕ ਹਨ।