ਵਿਸ਼ਵ ਫੁੱਟਬਾਲ ਦੇ ਸਭ ਤੋਂ ਵੱਡੇ ਸਿਤਾਰਿਆਂ ‘ਚੋਂ ਇਕ ਲਿਓਨਲ ਮੇਸੀ ਇਕ ਵਾਰ ਫਿਰ ਭਾਰਤ ਆਉਣ ਵਾਲੇ ਹਨ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਮੈਸੀ 13 ਦਸੰਬਰ ਨੂੰ ਕੋਲਕਾਤਾ ਪਹੁੰਚਣਗੇ ਅਤੇ ਤਿੰਨ ਦਿਨਾਂ ਵਿੱਚ ਚਾਰ ਸ਼ਹਿਰਾਂ ਦਾ ਦੌਰਾ ਕਰਨਗੇ। ਤੁਹਾਨੂੰ ਦੱਸ ਦੇਈਏ ਕਿ ਇਹ ਟੂਰ ਕਿਸੇ ਰਸਮੀ ਫੁੱਟਬਾਲ ਮੈਚ ਦਾ ਹਿੱਸਾ ਨਹੀਂ ਹੈ, ਸਗੋਂ ਭਾਰਤੀ ਪ੍ਰਸ਼ੰਸਕਾਂ ਦੇ ਨਾਲ ਸੱਭਿਆਚਾਰਕ ਅਤੇ ਪ੍ਰਸ਼ੰਸਕਾਂ ਦੀ ਸ਼ਮੂਲੀਅਤ ਆਧਾਰਿਤ ਪ੍ਰੋਗਰਾਮਾਂ ਦੀ ਲੜੀ ਹੈ। ਜ਼ਿਕਰਯੋਗ ਹੈ ਕਿ ਮੇਸੀ ਆਖਰੀ ਵਾਰ 2011 ‘ਚ ਅਰਜਨਟੀਨਾ ਟੀਮ ਨਾਲ ਭਾਰਤ ਆਏ ਸਨ, ਜਿੱਥੇ ਉਨ੍ਹਾਂ ਨੇ ਬਤੌਰ ਕਪਤਾਨ ਪਹਿਲੀ ਵਾਰ ਦੋਸਤਾਨਾ ਮੈਚ ਖੇਡਿਆ ਸੀ।
ਇਸ ਵਾਰ ਦੇ ਦੌਰੇ ਦੀ ਸਭ ਤੋਂ ਵੱਡੀ ਖਾਸੀਅਤ ਇਹ ਹੈ ਕਿ ਪ੍ਰਸ਼ੰਸਕਾਂ ਨੂੰ ਮੈਸੀ ਨੂੰ ਮਿਲਣ ਅਤੇ ਉਸ ਨਾਲ ਫੋਟੋ ਖਿਚਵਾਉਣ ਦਾ ਮੌਕਾ ਮਿਲੇਗਾ, ਹਾਲਾਂਕਿ ਇਸ ਦੀ ਕੀਮਤ 10 ਲੱਖ ਰੁਪਏ ਰੱਖੀ ਗਈ ਹੈ। ਪ੍ਰਬੰਧਕਾਂ ਦੇ ਅਨੁਸਾਰ, ਇਹ ਦੌਰਾ ਸਤਦਰੂ ਦੱਤਾ ਦੀ ਇੱਕ ਪਹਿਲਕਦਮੀ ਹੈ ਅਤੇ ਇਸ ਵਿੱਚ ਫੁੱਟਬਾਲ ਕਲੀਨਿਕ, ਦੋਸਤਾਨਾ ਮੈਚ, ਮਸ਼ਹੂਰ ਹਸਤੀਆਂ ਅਤੇ ਕਈ ਰਸਮੀ ਮੀਟਿੰਗਾਂ ਸ਼ਾਮਲ ਹੋਣਗੀਆਂ। ਮੇਸੀ ਦੇ ਨਾਲ, ਇੰਟਰ ਮਿਆਮੀ ਦੇ ਖਿਡਾਰੀ ਲੁਈਸ ਸੁਆਰੇਜ਼ ਅਤੇ ਅਰਜਨਟੀਨਾ ਟੀਮ ਦੇ ਸਾਥੀ ਰੋਡਰੀਗੋ ਡੀ ਪਾਲ ਵੀ ਕੁਝ ਸ਼ਹਿਰਾਂ ਵਿੱਚ ਹੋਣ ਵਾਲੇ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣ ਵਾਲੇ ਹਨ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਮੁੰਬਈ ਲੇਗ ਵਿੱਚ ਇੱਕ ਚੈਰਿਟੀ ਫੈਸ਼ਨ ਸ਼ੋਅ ਅਤੇ 2022 ਵਿਸ਼ਵ ਕੱਪ ਨਾਲ ਸਬੰਧਤ ਚੁਣੀਆਂ ਗਈਆਂ ਵਸਤਾਂ ਦੀ ਨਿਲਾਮੀ ਵੀ ਹੋਵੇਗੀ, ਜਿਸ ਦਾ ਉਦੇਸ਼ ਸਮਾਜਿਕ ਕੰਮਾਂ ਲਈ ਫੰਡ ਇਕੱਠਾ ਕਰਨਾ ਹੈ। ਇਸ ਤੋਂ ਇਲਾਵਾ ਮੈਸੀ ਯੂਨੀਸੈਫ ਦੇ ਰਾਜਦੂਤ ਵੀ ਹਨ, ਇਸ ਲਈ ਇਸ ਪੂਰੇ ਟੂਰ ਦਾ ਅਹਿਮ ਹਿੱਸਾ ਨੌਜਵਾਨ ਅਤੇ ਪਛੜੇ ਬੱਚਿਆਂ ਲਈ ਫੁੱਟਬਾਲ ਕਲੀਨਿਕ ਬਣਾਏ ਗਏ ਹਨ।
ਕੋਲਕਾਤਾ ‘ਚ ਮੇਸੀ ਭਾਰਤੀ ਕ੍ਰਿਕਟ ਟੀਮ ਦੇ ਸਾਬਕਾ ਕਪਤਾਨ ਸੌਰਵ ਗਾਂਗੁਲੀ ਅਤੇ ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨਾਲ ਵੀ ਮੁਲਾਕਾਤ ਕਰਨ ਜਾ ਰਹੇ ਹਨ। ਇਸ ਤੋਂ ਬਾਅਦ ਉਹ ਹੈਦਰਾਬਾਦ ਲਈ ਰਵਾਨਾ ਹੋਣਗੇ, ਜਿੱਥੇ ਰਾਜੀਵ ਗਾਂਧੀ ਇੰਟਰਨੈਸ਼ਨਲ ਸਟੇਡੀਅਮ ‘ਚ 7v7 ਫੁੱਟਬਾਲ ਮੈਚ ਹੋਵੇਗਾ। ਤੁਹਾਨੂੰ ਦੱਸ ਦੇਈਏ ਕਿ ਤੇਲੰਗਾਨਾ ਦੇ ਮੁੱਖ ਮੰਤਰੀ ਰੇਵੰਤ ਰੈੱਡੀ ਦੇ ਵੀ ਇਸ ਪ੍ਰੋਗਰਾਮ ਵਿੱਚ ਸ਼ਾਮਲ ਹੋਣ ਦੀ ਉਮੀਦ ਹੈ। ਮੇਸੀ ਦੇ ਕਰੀਅਰ ਨੂੰ ਸਮਰਪਿਤ ਇੱਕ ਵਿਸ਼ੇਸ਼ ਸੰਗੀਤ ਸਮਾਰੋਹ ਦੇ ਨਾਲ ਸਮਾਗਮ ਦੀ ਸਮਾਪਤੀ ਹੋਵੇਗੀ।
ਹੈਦਰਾਬਾਦ ਲੇਗ ਸਬੰਧੀ ਜਾਣਕਾਰੀ ਦਿੰਦਿਆਂ “ਦ ਗੋਟ ਟੂਰ ਹੈਦਰਾਬਾਦ” ਦੀ ਮੁੱਖ ਸਰਪ੍ਰਸਤ ਅਤੇ ਸਲਾਹਕਾਰ ਪਾਰਵਤੀ ਰੈੱਡੀ ਨੇ ਦੱਸਿਆ ਕਿ ਇੱਥੇ ਮੁੱਖ ਆਕਰਸ਼ਣ ਨੌਜਵਾਨ ਖਿਡਾਰੀਆਂ, ਖਾਸ ਕਰਕੇ ਪਛੜੇ ਬੱਚਿਆਂ ਲਈ ਇੱਕ ਫੁੱਟਬਾਲ ਕਲੀਨਿਕ ਹੋਵੇਗਾ, ਜਿਸ ਨੂੰ ਮੈਸੀ ਖੁਦ ਪ੍ਰੇਰਨਾਦਾਇਕ ਢੰਗ ਨਾਲ ਸੰਬੋਧਨ ਕਰਨਗੇ। ਸਮਾਗਮ ਨਾਲ ਜੁੜੇ ਲੋਕਾਂ ਦਾ ਮੰਨਣਾ ਹੈ ਕਿ ਇਹ ਟੂਰ ਭਾਰਤ ਵਿੱਚ ਫੁੱਟਬਾਲ ਸੱਭਿਆਚਾਰ ਨੂੰ ਨਵੀਂ ਊਰਜਾ ਦੇਵੇਗਾ ਅਤੇ ਮੇਸੀ ਵਰਗੇ ਸੁਪਰਸਟਾਰ ਦੀ ਮੌਜੂਦਗੀ ਨੌਜਵਾਨ ਪ੍ਰਤਿਭਾ ਨੂੰ ਉਤਸ਼ਾਹਿਤ ਕਰੇਗੀ, ਜਿਸ ਨੂੰ ਪ੍ਰਬੰਧਕਾਂ ਲਈ ਵੱਡੀ ਪ੍ਰਾਪਤੀ ਮੰਨਿਆ ਜਾ ਰਿਹਾ ਹੈ। ਸਾਰੀਆਂ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ।
